Lífsgæði

Lífsgæði felast m.a. í því að una sáttur við sitt og það er nú ekki erfitt hér í sveitinni í Provence. Hér höfum við lífsgæði sem vart finnast á landinu góða Íslandi, sem er vikulegur markaður. Í morgun fórum við á markaðinn eins og við gerum þegar við ekki förum út að róa sem er reglan á miðvikudögum en núna þar sem við höfum enn ekki töflurnar hans Jóns Braga vorum við of kvefuð og þá er farið á markað í stað þess að gera það á laugardegi.

Markaðsferð er persónuleg upplifun og enda þótt auglýst sé að Íslendingum þyki skemmtilegast að versla.... þá er miklu meira gaman að fara á markaðinn. Ræða við bændurna, kaupa sinn kjúkling af kjúklingabóndanum sem sjálfur hefur fengið útlit kjúklingsins, blóm af blómasalanum Jean sem ekkert gæti verið annað en blómakaupmaður, ostinn af Pierre með glimt í auga og rauðvín í glasi og fisk af klámkjaftinum Dalau ......... já það eru mikil lífsgæði að sleppa stórmarkaðnum.

Fannst fátt frétta í Mogganum í morgun , nema helst að forsætisráðherra okkar sé farinn að syngja einsöng. Það boðar gott, hlýnaði einnig um hjartarætur við að sjá málverk af þessum eina menningarmálaráðherra sem við höfum átt Gylfa Þ Gíslasyni. Hann var líka ágætt tónskáld .. ég leitaði blárra blóma o.s.frv. Auðvitað eigum við að hafa sérstakan menningarmálaráðherra , Íslendingar með þetta bullandi menningarlíf svo framarlega sem það verði ekki Þorgerður Katrín..?

Breyttir Tímar

Já þetta eru sannarlega breyttir tímar - maður les moggan beint á netinu, sem raunar bara sveitamönnum hér í Frakklandi finnst vera tíðindi, en það er allt það sem er að ske á Íslandi! Það þykir smáfrétt að úthlutað sé 56 milljónum í styrki úr sjóði Baugs! Ég minnist þess fyrir 5 árum þegar ég fékk úthlutað úr sjóði Landsbankans að mig minnir 200 þúsund krónum til að haldaa hér íslenska tónlistarhátíð og mig minnir að heildar úthlutunin hafi verið til tíu aðila alls um 2 miljónir og þótti gott ! Það er næstum þegar maður les viðskiptafréttir í dag að það sé búið að skipta út orðinu milljón fyrir miljarð.

Fyrst og fremst verður maður var við uppganginn í öllu 27% aukning gistinátta á hótelum, Geysir Green að fjárfesta víðsvegar um heiminn í orkugeiranum og viðskiptahallinn að minnka. Það er bara fylgi samfylkingar og bílainnflutningur sem dregst saman. Það fyrra vegna vandræðagangs og hið síðara af því að landið er sennilega orðið fullt af bílum.

Ég held að Jón Baldvin gerði rétt í því að a.hv. koma til hjálpar eða bjóða fram valkost t.d. eftir þeim línum sem Haukur Nikulásson hefur sett fram. Jón er tvímælalaust hæfasti stjórnmálaforingi sem kratar eiga og nú eftir að Davíð er allur (vonandi) myndi hann ná að blómstra á ný. Ég held að þjóðin hefði gott af því. Þetta yrði líka dálaglegur hópur ef allir ónægðir kratar , grænfriðungar Ómars Ragnarssonar, hulduher Margrétar Sverris og Kristins Gunnarssonar, Betri Byggð og aldraðir og öryrkjar kæmu saman.

Annars fannst mér pistill Guðmundar Steingríms um Hannes og heimildamyndaþáttagerð lang skemmtilegasta efni Moggans í dag. 

Ópera

Sitt sýnist hverjum um þá stefnu óperunnar að flytja helst stykki sem lítið eru flutt og ekki hafa heyrst hér áður. Árni Ragnarsson skrifaði fyrir nokkru í Lesbókina um afturhvarf til fortíðar  og svo kom okkar ástkæri stórtenór Gunnar Guðbjörnsson og andmælti honum. Hann hélt því meira að segja fram að það væri betra að hafa sýningar heldur færri en fleirri því þannig væri tapið minna. Ég held nú að menn verði að vera listamenn til að halda svona bulli fram. Það sér það hver heilvita maður að meginkostnaður óperusýningar er sviðsetning og æfingar auk annars fastakostnaðar og eftir því sem hann deilist á fleirri sýningar lækkar fasti kostnaðurinn auðvitað. Þetta er svona eins og hjá Steini Steinar"Að frelsa heiminn er eins og að spila á spil, með spekingslegum svip og taka í nefið, og þó þú tapir það gerir ekkert til, því það er nefnilega vitlaust gefið." Þetta er flottur skáldskapur og jafnvel gild heimspeki en þetta er léleg hagfræði.

Það er svo með óperusýningar þetta furðulega en um leið heillandi form tónlistarinnar og leikhússins að það er dýrt í uppfærslu. Jafnvel Parísaróperan með 2200 manns í sæti og miðaverð um 10.000 krónur að meðaltali fær aðeins um þriðjung rekstrarkostnaðar úr miðasölu. Samt sem áður skipta þær tekjur auðvitað verulegu máli.

Nei óperan þarf að vanda sig og fara bil beggja og það sýnist mér hún raunar vera að gera undir ágætri stjórn Bjarna óperustjóra, en hana vantar nýtt hús og þar þurfa menn að leggjast á árar með Gunnari Birgissyni og koma upp nýju óperuhúsi í Kópavogi. Nú hillir undir langþráð tónlistarhús á Íslandi og þá eigum við að nota þetta gengdarlausa góðæri og koma upp óperuhúsi. Þá fyrst getum við sagt að við höfum byggt yfir tónlistarflutning. Hvað eru fótboltahallirnar orðnar margar, nú eða handbolta? Allt gott um boltann en hann er ekki lífið allt. Stór hluti þess er tónlist.

 

 

Þjóðfélagsumræðan séð úr dálítilli fjarlægð

Ég hef verið sá lukkunnar pamfíll að vera að mestu búsettur hér í suður Frakklandi þar sem sólin skín en að öðru leyti skeður kannski heldur lítið.

Samt sá franska Telecom (les Landsíminn fyrir 20 árum) aumur á okkur hér í sveitinni og þannig komst ég í ADSL samband um þessa helgi. Skjaldbakan kemst þó hægt fari stundum betur en hérinn sem oft hleypur hér fyrir bílinn hjá mér í flani sínu.

Þess vegna hef ég verið sem límdur við tölvuskjáinn og fylgst með mbl.,rúv., silfri egils á stöð tvö og lesið blogg. Það er alveg ótrúlegur kraftur í þjóðfélagsumræðu á Íslandi og eins og allir ætli í framboð, enda kannski ekki að furða eftir þau kjör sem nú bjóðast kjörnum fulltrúum og að teknu tilliti til þess að þeir þurfa aldrei að sæta ábyrgð og geta jafnvel boðið sig fram í örugg sæti eftir að hafa verið dæmdir fyrir siðblindu. Já það er mikið rætt og mikið grætt á Íslandi.

Mér þóttu íþróttafréttir alveg ótrúlega amerískar. Amerískur ruðningsbolti, amerískur körfubolti, amerískt golf - eru Íslendingar svona ameríkaníseraðir?? Þetta minnti mig á þegar ég fór í tvígang í sjálfboðavinnu til Uganda fyrir u.þ.b. ári og komst að raun um að einfaldasta leiðin til að komast í samband við unga fólkið einkum stráka var að spurja þá hvort þeir fylgdu Arsenal eða Manchester United að málum og vera svo á sama máli og þeir og þá var ísinn brotinn. Í þessu land lokaða hitabeltislandi fylgdust allir með enska boltanum. Ungandískur fótbolti var svo spilltur peningalega að menn höfðu gefist upp á honum og tekið þann enska eins og Eggert og Björgúlfur.

Það var svo sem fjölmargt sem mér þótti athyglisvert en ég ætla aðeins að nefna hér eitt mál sem var umræðan um stóriðjumálin. Mér fannst bók Andra Snæs svo sem um margt ágæt og Ómar hefur bent á ýmislegt en fara Íslendingar nú ekki aðeins offari? Hér í Frakklandi er ekki annað meira rætt en hlýnun jarðar og hvað sé unnt að gera í að spara mengandi orku. Ég hef amk. ekki séð það í umræðunni að sú orka sem við virkjum með því að breyta krafti flúða í orku sé hrein og miklu hreinni en ef þessi álver væru knúin orku framleiddri með olíu eða kolum. Sjálfur bý ég hér við vatn sem myndað var af frönsku Landsvirkjun á sjöunda áratug síðustu aldar og hefur verið mikil lyftistöng fyrir mannlíf hér um slóðir. Ég gef ekki mikið fyrir þó eitthvert grjót fari í kaf á hálendinu við höfum yfrið nóg af því.

Kannski væri tækifæri að dusta rykið af GECA kerfinu sem Edgar Guðmundsson verkfræðingur ásamt fleirum góðum mönnum barðist fyrir í nær tuttugu ár til að koma upp raunhæfum ódýrum byggingum fyrir fátækt fólk en sú framleiðsluaðferð sem byggir á framleiðslu sementsbundinna spónaeininga bindur mikið magn af koldíoxíði. Það fyrirtæki var látið fara hljóðlega á hausinn fyrir tveim árum eða svo.

Læt hér staðar numið í dag fyrsta degi blogg færslu

 

Fyrsta bloggfærsla

Þessi færsla er búin til af kerfinu þegar notandi er stofnaður. Henni má eyða eða breyta að vild.